هاااام لتلاميذ الصفوف الرابع والخامس والسادس الابتدائي إزاى تتعامل مع مظاهر الجمال بكل سهولة



هاااام لتلاميذ الصفوف الرابع والخامس والسادس الابتدائي إزاى تتعامل مع مظاهر الجمال بكل سهولة




مشكلة حفظ مواطن الجمال
دي المشكلة اللي بتواجه الطلاب وأولياء أمورهم لأن الحفظ موهبة
مواطن الجمال كلها في المرحلة الابتدائية هتتلخص في كذا نقطة

 ************
جميع أساليب النداء في المرحلة الابتدائية كلها بتبدأ بأداة النداء ( يا ) يبقي أنت أول ما هتشوف ( يا ) في الأسلوب تقول أسلوب نداء . وبعدين هتلاقي النداء ده ( يا مصر ) يبقي النداء للتعظيم . طيب ولو كان النداء للمؤمنين ( يا أيها الذين آمنوا ) أيوه ده كمان نداء للتعظيم .طيب ولو كان النداء بين اتنين زي بعض بني آدمين . هتقول أسلوب نداء وبعدين تشرح الاسلوب وده مرتبط إنك تكون عارف المعاني . بكده هيكون النداء 4 أنواع
1- من الله للمؤمنين : يبقي أسلوب نداء غرضه التعظيم
2- من المؤمنين إلي الله : يبقي أسلوب نداء غرضه الدعاء .
3- من عاقل لغير العاقل : يبقي أسلوب نداء فيه تشبيه أو تشخيص
4- من إنسان لإنسان آخر : يبقي ده أسلوب نداء وتبدأ تشرح الكلمتين اللي في الأسلوب .

#أسلوب_الأمر
************
أي أسلوب بيبدأ( بفعل أمر ) يبقي ده أسلوب أمر زي ( ادخلوا في السلم كافة ) أيوة ده أسلوب أمر لأنه بيبدأ بفعل أمر . وجميع أساليب الأمر اكتب قصادها وأنت مطمن 👈 أسلوب أمر غرضه النصح والإرشاد و الحث و الطلب .

#أسلوب_النهي
************
أي أسلوب بيبدأ ب ( لا ) الناهية يبقي ده أسلوب نهي .زي ( لا تمل بوجهك / لا يكن للخصام قلبك مأوي ) أيوه دي أساليب نهي فأنت أول ما تشوف لا الناهية في الجملة علي طول تقول 👈 أسلوب نهي غرضه التحذير والتنفير لو كان النهي من الله زي ( لا تتبعوا خطوات الشيطان ) . أما لو النهي ده من إنسان لإنسان آخر يبقي غرضه النصح و الإرشاد بس ..

#أسلوب_النفي
************
وده الأسلوب اللي بيبدأ بأداة من أدوات النفي اللي هي ( ما . لا . لن . لم ) زي
★( ما أنا فحمة ولا أنت فرقد )
★( لا يحب الله الجهر بالسوء )
★( الله لا يحب كل مختال فخور )
★( لن تنالوا البر حتي تنفقوا مما تحبون )
★( لم يحب مصر الكارهون )
دي هتقول ببساطة 👈 أسلوب نفي يدل علي أن( ............... ).هتحط مكان النقط شرح الكلام اللي جوه الأسلوب بس هتشيل الكلمة وتحط معناها .

#أسلوب_التوكيد
*************
أساليب التوكيد دي اللي بتبدأ بحرف من حروف التوكيد ( إنَّ . أنَّ ) أول ما تشوف حرف منهم علي طول تقول 👈 أسلوب مؤكد بإن يدل علي أن ( .............) و اشرح الأسلوب بانك تشيل الكلمة وتحط معناها . تاخد أمثلة ؟ . حاضر
( إن ذلك من عزم الامور )
( إن أنكر الاصوات لصوت الحمير )
( إن قلبي للحب أصبح معبدا ) . خليك فاكر إن أساليب التوكيد بتيجي دايما في الامتحان .

#التشبيه
*******
أول ما تلاقي إن الشاعر بيقول علي حاجة إنها زي حاجة تانية خالص يبقي ده تشبيه . خد مثال
★( إن رمي الدهر سهامه )
هو الدهر بيرمي حاجة ؟ لا طبعا لأن الرمي من صفات الإنسان . يبقي ده تشبيه لأنه شبه الدهر بإنسان يرمي السهام
★ ( مصر انهضي يحيا العلم )
هنا الشاعر بيكلم مصر كأنها هتسمع كلامه يبقي ده تشبيه . لأن مصر ولا هتسمع ولا هتتكلم . كمان يحيا العلم دي تشبيه لان العلم ولا بيعيش ولا بيموت .

#التضااااااااد
************
دي بقي أسهل حاجة . أنت أول ما تشوف كلمتين عكس بعضهم بسرعة وبدون ما تتردد هتقول
👈 بينهما تضاد يقوي المعني و يوضحه .
زي ( البردة الموشاة- كسائي الرديم )( تشقي / تسعد )( أخي الأبيض و الأسود ) . ( يبسط الرزق لمن يشاء و يقدر . ) ( السماء / الارض ) . ( أعلاها / أسفلها ) وغيرها

#الافعاااال_المضارعة
******************
جميع الأفعال المضارعة تدل علي التجدد و الاستمرار فأول ما يقولك ليه استخدم الشاعر الأفعال المضارعة تقول للتجدد و الاستمرار.

#التعبيرات_المتنوعة
*****************
افرض بقي طلع غلس و جاب لك موطن جمال مش من الاساليب اللي فاتت هتعمل ايه ؟!!😢
متخافش واضحك كده 👈
أنت تنقل الموطن في كراستك و تحط نقطتين فوق بعض وتكتب👈
تعبير جميل يدل أن الشاعر ( .................. ) ايوه هتحط مكان النقاط دي شرح الكلام بكل سهولة عشان أنت عارف المعاني .
★★★★★★★★★★★★★

ملاحظة مهمة جدا:-

1- الطريقة دي للي ملوش في الحفظ او اللي بيحفظ و ينسي لكن لو انت بتعرف تحفظ كويس توكل علي الله وملكش دعوة بنا .

2- مفيش معلم لغة عربية مهما كان يقدر يقلل من درجتك لأن مواطن الجمال دي اسمها ( التذوق الأدبي )
*****************************************
في النهاية أدعو الله تعالى أن يكون هذا العمل خالصا لوجهه الكريم . ولا تنسوا الدعاء لصاحب هذا العمل.
*****************************************
جزى الله خيرا من قام بهذا العمل أو نسقه أو ساهم فى نشره

ليست هناك تعليقات:

يتم التشغيل بواسطة Blogger.